Athugasemd frá Landsneti.

22. desember 2010 kl. 13:33
Vegna fréttar í fréttatíma sjónvarps 16. desember, þar sem því var haldið fram að flutningskostnaður raforku væri mun hærri á Vestfjörðum en annarsstaðar á landinu, vill Landsnet koma eftirfarandi á framfæri:
Gjaldskrá fyrir flutning raforku er sú sama fyrir allt landið og er hún óháð þeirri vegalengd sem raforkan er flutt frá virkjunum til dreifiveitna. Flutningskostnaður raforkunnar er því sá sami á höfuðborgarsvæðinu og á Vestfjörðum.

Frá því í febrúar 2008 til dagsins í dag hefur gjaldskrá Landsnets fyrir flutning raforku til almennra notenda hækkað um 10%. Á sama tíma hefur kostnaður vegna flutningstapa og tengdra liða sem koma til viðbótar flutningsgjaldi Landsnets lækkað verulega þannig að heildarflutningskostnaður hefur hækkað minna en áðurnefnd 10%.

Á þessu sama tímabili hefur vísitala neysluverðs hækkað úr 282,3 í 365,5 stig, eða alls um liðlega 29%. Á föstu verðlagi hefur því flutningskostnaður til almennra notenda lækkað um u.þ.b. 20% að raungildi á tímabilinu, en þessum árangri hefur Landsnet náð með margvíslegum aðgerðum sem miða að hagræðingu í rekstri fyrirtækisins.

Á línuritinu hér að neðan má sjá gjaldskrárbreytingar Landsnets og þróun vísitölu neysluverðs frá janúar 2005.

Kostnaður heimila og fyrirtækja við kaup á raforku skiptist í þrjá þætti: Kaupverð raforkunnar, flutningskostnað og kostnað við dreifingu hennar. Flutningskostnaður er nú um 10% af kostnaði raforkunnar og hefur hlutfall hans lækkað á undanförnum árum. Ástæða þess er sú að Landsnet hefur hækkað gjaldskrá sína mun minna en aðrir aðilar raforkumarkaðarins.

Margskonar endurbætur hafa verið gerðar á kerfi Landsnets á Vestfjörðum á síðustu árum og miða þær að því að auka rekstraröryggi raforkukerfisins í fjórðungnum. Endurbætur hafa verið gerðar á varnarbúnaði til að verja kerfið betur fyrir áföllum og hefur þetta skilað góðum árangri. Nýlega var lagður 66kV jarðstrengur milli Ísafjarðar og Bolungarvíkur og í undirbúningi er að setja upp sjálfvirka vararafstöð á Ísafirði. Frekari aðgerðir eru í undirbúningi til að bæta enn frekar afhendingu raforkunnar í fjórðungnum.

Nánari upplýsingar: Garðar Lárusson, viðskiptastjóri, s: 892-0084

Mjólká 3 tekin í rekstur.

17. desember 2010 kl. 13:14

Mjólká 3 er staðsett í landhæð 218 m y.s. ofan við Borgarhvilftarvatn.  M.f. mynd sýnir stöðvarhúsið ofan við Borgarhvilftarvatn og er hægra megin á myndinni. Vinstra megin er inntaksmannvirki Mjólkár 1.  Virkjuninni er ætlað að nýta rennsli Mjólkár 1 áður en það er virkjað neðan Borgarhvilftarvatns. Það er gert með því að veita Hofsárveitu úr Borgarhvilftarlæk um nýjan veituskurð í Mjólkána ofan Prestagilsvatns. Þar með fer allt rennsli um Prestagilsvatn áður en það fer í Borgarhvilftarvatn. Inntaksmannvirki virkjunarinnar er tengt við Prestagilsstífluna sem felst í vatnsþró og húsi með lokubúnaði.  Þrýstipípan er 337 m löng úr DN 800 mm trefjaplasti og er að mestu niðurgrafinn.

Eftir að prófunum og þjálfun starfsmanna lauk föstudaginn 10.desember var vélin tekin í loka útsláttarprufur sem gengu vel. Af þeim loknum afhenti fulltrúi vélaframleiðanda Sölva R. Sólbergssyni framkvæmdarstjóra orkusviðs Orkubús Vestfjarða vélina til rekstrar.  Afl vélarinnar er 1,16 MW og er áætlað að orkuframleiðslan verði um 6,5 GWh á ári.  Afl Mjólkárvirkjunar er þá orðið 9,3 MW. 

 

Nánar um vélina, verg fallhæð er 100 metrar, vatnsnotkun hverfis við fullt álag er 1,4 m3/s, snúningshraði 1000 sn/mín og er vatnshverfillinn af Francis gerð.  Framleiðandinn Andritz Hydro er með höfuðstöðvar í Austurríki, en í rauninni er vélin Þýsk því öll hönnunin átti sér stað þar og hluti af framleiðslunni einnig.  Rafali, 400 V er frá Hitzinger svo eitthvað sé nefnt.            

 

Mjólká 3

5. desember 2010 kl. 13:49
1 af 4

Nú um helgina var stigið stórt skref við Mjólká 3, hleypt var vatni á pípuna og vélin látin snúast á laugardag, 4. desember. Í dag sunnudag 5. desember kl.16:37 var aflrofinn settur inn og fyrstu kwh framleiddar frá Mjólká 3. Þó að þessi virkjun sé ekki stór er hún gott innlegg í orkuvinnslu á Vestfjörðum.

Verðskrá fyrir raforku.

1. október 2010 kl. 08:43

 

Verðskrá OV fyrir raforkusölu hækkar um 5,3% frá og með 1. október 2010.

Þetta gildir um alla liði verðskrárinnar nema ótryggða orku.

 

Þessi hækkun verðskrár er nauðsynleg til þess að mæta hækkun á heildsölugjaldskrá Landsvirkjunar um 8,3 % frá 1. júlí s.l.

 

Þrátt fyrir þessa hækkun verður Orkubú Vestfjarða áfram með lægsta auglýsta raforkuverð á landinu.

 

Verðskrá OV fyrir raforkusölu má finna hér.



     

Verðskrá fyrir raforku.

30. júlí 2010 kl. 10:57

 

Verðskrá OV fyrir raforkusölu hækkar um 3% frá og með 1. ágúst 2010.

Þetta gildir um alla liði verðskrárinnar nema ótryggða orku.

 

Þessi hækkun verðskrár er nauðsynleg til þess að mæta að hluta hækkun á gjaldskrá Landsvirkjunar um 8,3 % 1. frá júlí s.l.

 

Þrátt fyrir þessa hækkun verður Orkubú Vestfjarða áfram með lægsta auglýsta raforkuverð á landinu.

 

Verðskrá OV fyrir raforkusölu má finna hér.



    

Eldri færslur